پولیس کے ڈر سے تحریکیں کینسل کرنیوالے کو گیدڑ کہتے ہیں، مریم کا طنز

مسلم لیگ ن کی چیف آرگنائزر اور سینئر نائب صدر مریم نواز نے پاکستان تحریک انصاف کی جانب سے ریلی کینسل کرنے پر اپنے ردعمل کا اظہار کیا ہے۔

سوشل میڈیا پر جاری بیان میں مریم نواز نے لکھا کہ پولیس کے ڈر سے“تحریکیں” کینسل کرنے والے کو گیدڑ کہتے ہیں، انہوں نے کسی کا نام لیے بغیر یہ بھی لکھا کہ خوف سے گھر میں دبک جانے والے کو گیدڑ کہتے ہیں۔

مریم نواز نے سوشل میڈیا پر لکھا کہ جو مشرف کی ہر رکاوٹ توڑ کر سامنے سے لیڈ کرے اسے نواز شریف کہتے ہیں، گوجرانوالہ پہنچنے سے پہلے عدلیہ بحال کروا دینے والے شیر دل لیڈر کو نواز شریف کہتے ہیں۔

یاد رہے کہ چیئرمین پاکستان تحریک انصاف عمران خان نے گزشتہ روز اعلان کیا تھا کہ اتوار کے روز ہم ریلی نکالیں گے جس کی قیادت میں خود کروں گا تاہم نگران حکومت پنجاب کی جانب سے دفعہ 144 نافذ کیے جانے کے بعد پی ٹی آئی نے اپنی ریلی ایک روز کے لیے ملتوی کر دی ہے۔