17 سال بعد پاکستان میں ٹیسٹ سیریز کھیلنے آئی انگلش ٹیم وائٹ واش کرکے وطن واپس روانہ
17 سال بعد پاکستان میں ٹیسٹ سیریز کھیلنے آئی انگلش ٹیم پاکستان کو وائٹ واش کر کے وطن واپس روانہ ہوگئی۔ انگلینڈ کرکٹ ٹیم نے پہلے راولپنڈی اور ملتان میں ٹیسٹ جیتا اور پھر گزشتہ روز کراچی ٹیسٹ بھی اپنے نام کرکے پاکستان کو سیریز میں وائٹ واش کیا۔
پاکستان کرکٹ ٹیم کو ہوم گراؤنڈ پر 70 سال میں پہلی مرتبہ انگلینڈ نے ٹیسٹ سیریز میں وائٹ واش کیا۔ انگلینڈ اور پاکستان کی ٹیسٹ سیریز کے اختتام کے بعد انگلش کرکٹ ٹیم وطن واپسی کے لیے رات گئے کراچی ائیرپورٹ پہنچی، کھلاڑیوں کو ہوٹل سے خصوصی حفاظتی انتظامات اور پروٹوکول میں ایئرپورٹ پہنچایا گیا۔
ایوی ایشن ذرائع کے مطابق انگلش کرکٹ ٹیم کے 13 کھلاڑی اور ایک آفیشل کراچی سے روانہ ہوئے۔ ذرائع کے مطابق انگلینڈ کے کھلاڑی کراچی سے پرواز ای کے 607 سے دبئی کے راستے وطن پہنچیں گے۔