دیامر میں سیاحوں کی بس گہری کھائی میں گرگئی، 5 افراد جاں بحق

گلگت بلتستان کے ضلع دیامر میں سیاحوں کی بس  گہری کھائی میں گرگئی۔

یہ افسوس ناک واقع شاہراہ قراقرم میں تھلچی کے مقام پر پیش آیا جس میں ابتدائی طور پر 5 مسافروں کے جاں بحق ہونے کی تصدیق ہوئی ہے۔

ریسکیو حکام کے مطابق 12 افراد زخمی بھی ہوئے ہیں، لاشوں اور زخمیوں کو گلگت کے اسپتال منتقل کیا گیا ہے۔پولیس اور مقامی رضاکار امدادی کارروائیوں میں مصروف ہیں۔

پولیس کے مطابق  سیاحوں پر مشتمل مسافر ہائی روف حادثے کا شکار ہوئی ہے، جاں بحق افراد میں 2 خواتین بھی شامل ہیں۔

وزیراعظم شہباز شریف نے دیامربس حادثے میں قیمتی جانوں کے نقصان پر اظہار افسوس کرتے ہوئےگلگت بلتستان کے حکام کو فوری امدادی کارروائیوں کی ہدایت کی ہے۔

وزیراعظم شہبازشریف نے متعلقہ وفاقی محکموں کو امدادی کاموں میں معاونت کی بھی ہدایت کی ہے۔