جے یو آئی نے اپوزیشن الائنس میں شمولیت کیلئے پی ٹی آئی کو اپنی شرائط سےآگاہ کر دیا

جمعیت علمائے اسلام (جے یو آئی) نے گرینڈاپوزیشن الائنس میں شمولیت کیلئے پاکستان تحریک انصاف کو اپنی شرائط سے آگاہ کردیا۔

ذرائع کے مطابق جے یو آئی نے اسد قیصر کو اپنی شرائط سے آگاہ کیا اور اسد قیصر نے پارٹی کے بعض مرکزی رہنماؤں کو شرائط سے متعلق بتایا۔

پی ٹی آئی ذرائع کا کہنا ہے کہ جمعیت علمائے اسلام کی کئی شرائط وزیراعلیٰ خیبرپختونخوا علی امین گنڈاپور کے بارے میں ہیں اور اسد قیصر نے شرائط سے متعلق وزیراعلیٰ کے پی کوباضابطہ آگاہ نہیں کیا۔

پی ٹی آئی ذرائع کے مطابق اسد قیصربانی پی ٹی آئی سے براہ راست بات چیت کرنا چاہتے ہیں۔

اس حوالے سے ایک نیوز چینل سے گفتگو میں سیکرٹری اطلاعات پی ٹی آئی شیخ وقاص اکرم  کا کہنا تھاکہ جے یو آئی نے اپنے تحفظات سےآگاہ کیا ہے، تحفظات سے متعلق بانی پی ٹی آئی کے احکامات پرعمل درآمد ہوگا۔

ترجمان جے یو آئی اسلم غوری نے کہا کہ الائنس میں شرکت سے متعلق جےیو آئی نے باضابطہ فیصلہ نہیں کیا جو  بھی فیصلہ ہوگا سب کو پتا چل جائےگا۔

دوسری جانب ایک نیوز پروگرام میں گفتگو کرتے ہوئے پی ٹی آئی کے سینیئر رہنما اسد قیصر نے کہا ہے کہ مولانا فضل الرحمان کو علی امین گنڈاپور سے کوئی مسئلہ نہیں، ان سے اتحاد کے بارے میں ہمیں صرف بانی پی ٹی آئی سے ہدایات کا انتظار ہے۔

جے یو آئی کی طرف سے خیبر پختونخوا میں الیکشن آڈٹ کے مطالبے پر کہا کہ ہم سے بھی پشاور میں سیٹیں چھینی گئیں جو چاہتا ہے آئے اور پشاور میں الیکشن آڈٹ کرا لے۔