2017 کی چیمپئنز ٹرافی کے فائنل سے متعلق شیکھر دھون نے کیا اعتراف کیا؟

بھارتی کرکٹ ٹیم کے سابق بیٹر اور چیمپئنز ٹرافی کے ایمبیسیڈر شیکھر دھون نے اعتراف کیا ہےکہ 2017 کی چیمپئنز ٹرافی کے فائنل میں ہم دباؤ میں آگئے تھے۔

چیمپئنز ٹرافی 2025 کی افتتاحی تقریب میں چیمپئنز ٹرافی کے ایمبیسیڈر شیکھر دھون کا بھی ویڈیو پیغام سنایا گیا۔

شیکھر دھون نے کہا کہ 2017 میں جلد وکٹیں گرنے سے ہم دباؤ میں آگئے تھے، اس ٹورنامنٹ میں ہم اچھا کھیلے لیکن فائنل میں جلد وکٹیں گرگئیں۔

انہوں نے کہا کہ پاکستان بھارت میچ کے احساسات کچھ خاص ہوتے ہیں، ہر کوئی پاک بھارت میچ کی بات کر رہا ہوتا ہے، یہ ایک خاص دن ہوتا ہے اور دونوں ٹیمیں خاص تیاری کرتی ہیں۔

شیکھر دھون نے مزید کہا کہ 2013 چیمپئنز ٹرافی میرا یادگار ایونٹ تھا، میں نے کم بیک کیا تھا اور مشکل کنڈیشنز تھیں، مجھے جنوبی افریقہ کے خلاف سنچری یاد رہے گی۔

خیال رہے کہ چیمپئنز ٹرافی 2025 کی افتتاحی تقریب لاہور کے شاہی قلعہ میں ہوئی جس میں آئی سی سی چیمپئنز ٹرافی 2017 کی فاتح پاکستان ٹیم کے کپتان سرفراز احمد اور دیگر کھلاڑی بھی شریک تھے۔

انٹرنیشنل کرکٹ کونسل کے چیف ایگزیکٹو جیف آلڈر ڈائس، پاکستان کرکٹ بورڈ کے اعلیٰ حکام، حکومتی اور سیاسی شخصیات سمیت سابق کرکٹرز بھی تقریب میں موجود تھے۔

تقریب میں چیمپئنز ٹرافی 2017 کی فاتح ٹیم کے کھلاڑی محمد حفیظ، جنید خان، محمد عامر، اظہر علی اور حارث سہیل بھی شریک تھے۔

چیمپئنز ٹرافی کے برانڈ ایمبسیڈر نیوزی لینڈ کے ٹم ساؤتھی، سابق جنوبی افریقی بیٹر ڈومینی بھی تقریب میں موجود تھے۔