جے یو آئی کا ضمنی انتخابات کے بائیکاٹ اور احتجاجی تحریک شروع کرنیکا اعلان

جمعیت علمائے اسلام (جے یوآئی) ف نے ضمنی انتخابات کے بائیکاٹ کا اعلان کر دیا۔

جے یو آئی کے سربراہ مولانا فضل الرحمان نے سوشل میڈیا پر جاری ویڈیو میں اعلان کیا کہ جے یو آئی کا کوئی امیدوار ضمنی انتخابات میں حصہ نہیں لےگا۔

ویڈیو بیان میں مولانا فضل الرحمان کا کہنا ہے کہ ہم 8 فروری کے انتخابات کے نتائج کو مستردکرتے ہیں کیونکہ یہ پارلیمنٹ عوام کی نمائندہ کم اور اسٹیبلشمنٹ کی نمائندہ زیادہ ہے۔

مولانا فضل الرحمان کے ویڈیو بیان میں 8 فروری کے انتخابی نتائج کے خلاف 25 اپریل سے بلوچستان سےتحریک شروع کرنے کا بھی اعلان کیا گیا ہے،  ان کا کہنا ہے کہ ہم نے عوام کی طرف جانے کا فیصلہ کیا ہے،عوام کو متحد کر کے اعتماد میں لیں گے۔

مولانا فضل الرحمان نے مزید کہا کہ کراچی، پشاور اور لاہور میں بھی جلسےکریں گے، دیگر سیاسی جماعتوں سے بھی رابطہ کر رہےہیں، الیکشن کمیشن  بےبس ہے، ان کو نتیجہ مرتب کرنےکی اجازت نہیں ہے۔