سپریم کورٹ کے فیصلے سے مطمئن نہیں، تحفظات موجود ہیں: چیئرمین پی ٹی آئی

چیئرمین پاکستان تحریک انصاف (پی ٹی آئی) بیرسٹر گوہر خان کا کہنا ہے سپریم کورٹ کے گزشتہ روز کے فیصلے سے مطمئن نہیں، فیصلے پر ہمارے تحفظات موجود ہیں۔

میڈیا سے گفتگو کرتے ہوئے بیرسٹر گوہر خان کا کہنا تھا سپریم کورٹ کے فیصلے کا احترام کرتے ہیں لیکن ہم اس فیصلے سے مطمئن نہیں ہیں، پی ٹی آئی الیکشن کا بائیکاٹ نہیں کرے گی لیکن ہم سپریم کورٹ سے استدعا کررہے ہیں ہماری درخواستوں کو بھی سنا جائے۔

ان کا کہنا تھا ہماری استدعا ہے کہ ڈی آر اوز اور آر اوز فری اینڈ فیئر الیکشن کرائیں لیکن جن ڈی سیز نے ایم پی اوز کے آرڈر کیے وہ کیسے الیکشن صاف و شفاف کرائیں گے، سپریم کورٹ نے عمیر نیازی کو ایک نوٹس ایشو کیا ہے، توہین عدالت کے نوٹس ہوں گے تو کوئی بھی صاف و شفاف الیکشنز کیلئے عدالت نہیں جائے گا۔

انہوں نے کہا کہ بانی پی ٹی آئی عمران خان کے ٹرائل جیل میں کرائے جا رہے ہیں تاکہ دباؤ بڑھے اور سمجھوتا ہو لیکن بانی پی ٹی آئی سمجھوتا نہیں کریں گے۔

صاف شفاف الیکشن کرانے ہیں تو حکومتی نمائندوں کے آر اوز اور ڈی آر اوز کا رول نہیں ہونا چاہیے، تمام ریٹرننگ افسران عدلیہ سے ہونے چاہئیں۔

ایک سوال کے جواب میں چیئرمین پی ٹی آئی کا کہنا تھا پی ٹی آئی نے کبھی الیکشن میں تاخیر کی کوشش نہیں کی لیکن وہ لوگ جنہوں نے ایک پارٹی کو نشانہ بنایا ان سے فری اینڈ فیئر الیکشن کی توقع نہیں ہے۔

بیرسٹر گوہر کا کہنا تھا پی ٹی آئی واحد پارٹی ہے جو کوشش کر رہی ہے کہ جمہوریت ڈی ریل نہ ہو اور ہر پارٹی کا حق ہے کہ وہ عدالت کے سامنے اپنے تحفظات رکھے۔

یاد رہے کہ گزشتہ روز سپریم کورٹ کے لاہور ہائیکورٹ کے الیکشن کمیشن کی جانب سے آر او اور ڈی آر اوز کی تعیناتی سے متعلق فیصلے کو کالعدم قرار دیتے ہوئے کل ہی الیکشن شیڈول جاری کرنے کا حکم دیا تھا جس کے بعد الیکشن کمیشن نے گزشتہ روز ہی 8 فروری 2024 کو ہونے والے انتخابات کا شیڈول جاری کر دیا تھا۔