ورلڈکپ فائنل کے لیے بنائی گئی پِچ کیسی ہوگی؟ تفصیلات سامنے آگئیں

آئی سی سی ون ڈے ورلڈکپ کا فائنل 19 نومبر یعنی کل بروز اتوار کو احمد آباد کے نریندر مودی اسٹیڈیم میں کھیلا جائے گا۔

فائنل میں اس ایونٹ کی ناقابلِ شکست ٹیم بھارت آسٹریلیا سے ٹکرائے گی، لیگ میچز میں بھارت نے کینگروز کو شکست دی تھی۔

بھارتی میڈیا رپورٹس کے مطابق بھارت اور آسٹریلیا کے درمیان ورلڈکپ فائنل کے لیے پچ کی تیاری حتمی مرحلے میں داخل ہوگئی ہے۔

رپورٹس کے مطابق فائنل میچ کے لیے نریندر مودی کرکٹ اسٹیڈیم میں بنائی گئی پِچ سِلو ہوگی،یہ پچ پاک بھارت میچ جیسی ہوگی جو کہ 14 اکتوبر کو کھیلا گیا تھا، یہ پچ  بلے بازوں اور بولرز دونوں کے لیے سازگار ہے۔

پچ کیوریٹر نے بھارتی میڈیا کو بتایا کہ پہلے بیٹنگ کرنے والی ٹیم کے لیے 315 تک بہترین اسکور ہوسکتا ہے، یہ ایک قابل دفاع اسکور ہوگا کیونکہ بعد میں بیٹنگ کرنے والی ٹیم کو مشکل ہوگی۔

بھارتی میڈیا کے مطابق آئی سی سی پچ کنسلٹنٹ نےفائنل کے لیے منتخب پچ کی تیاری کا جائزہ لیا۔