کوئٹہ کو شکست دیکر اسلام آباد کی ٹیم پلے آف مرحلے میں پہنچ گئی

ایچ بی ایل پی ایس ایل (پاکستان سپر لیگ) کے 21 میچ میں اسلام آباد یونائیٹڈ کی ٹیم کوئٹہ گلیڈی ایٹرز کو شکست دیکر  ٹورنامنٹ کے پلے آف مرحلے میں پہنچ گئی۔

راولپنڈی کرکٹ گراؤنڈ میں کھیلے گئے میچ میں کوئٹہ گلیڈی ایٹرز کی جانب سے اننگز کا آغاز  یاسر خان اور ول سمیڈ نے کیا لیکن ول سمیڈ بغیر کوئی رن بنائے آؤٹ ہو گئے، یاسر خان بھی 5 رن کے مہمان ثابت ہوئے جبکہ کپتان سرفراز احمد کو مبصر خان نے باؤنڈری پر شاندار کیچ پکڑ کر پویلین کی راہ دکھائی۔

افتخار احمد بھی 17 کے مجموعے پر صرف 2 رنز بنا کر آؤٹ ہو گئے، چار وکٹیں جلد گرنے کے بعد محمد نواز اور نجیب اللہ زادران کے درمیان 104 رنز کی شراکت قائم ہوئی اور محمد نواز 52 رنز بنا کر آؤٹ ہوئے۔

نجیب اللہ زادران بھی 59 رنز کی اچھی اننگز کھیل کر آؤٹ ہوئے لیکن عمر اکمل نے آتے ہی چھکوں کی برسات کردی اور صرف 14 گیندوں پر 5 چھکوں اور 2 چوکوں کی مدد سے 43 رنز اسکور کر کے اپنی ٹیم کا اسکور 179 رنز تک پہنچا دیا۔

اسلام آباد کی جانب سے فضل حق فاروقی نے 3، فہیم اشرف نے دو اور رومان رئیس نے ایک کھلاڑی کو آؤٹ کیا۔

اسلام آباد کی اننگز

کوئٹہ گلیڈی ایٹرز کی جانب سے دیے گئے ہدف کے تعاقب میں اسلام آباد کا آغاز بھی اچھا نہ رہا اور پہلی ہی گیند پر رحمان اللہ گرباز ایل بی ڈبلیو ہو گئے لیکن کولن منرو نے جارحانہ بیٹنگ کرتے ہوئے 29 گیندوں پر 63 رنز کی برقرفتار اننگز کھیلی۔

ایک موقع پر اسلام آباد کے 6 کھلاڑی 111 ر نز پر پویلین لوٹ چکے تھے لیکن اس کے بعد اعظم خان اور فہیم اشرف نے ایک بار پھر ذمہ دارانہ بیٹنگ کرتے ہوئے ٹیم کا اسکور آگے بڑھایا اور 169 کے مجموعے پر اعظم خان 35 رنز بنا کر کیچ آؤٹ ہو گئے لیکن فہیم اشرف نے 3 گیندوں پہلے ہی ہدف پورا کر دیا اور وہ 39 رنز بنا کر ناقابل شکست رہے۔

قبل ازیں اسلام آباد کے کپتان شاداب خان نے ٹاس جیت کر پہلے بولنگ کا فیصلہ کیا۔

شاداب خان کا کہنا تھا ہم ہدف کو حاصل کرنا چاہتے ہیں اس لیے پہلے بولنگ کریں گے، ٹیم میں دو تبدیلیاں کی گئی ہیں، رحمان اللہ گرباز اور فضل حق فاروقی کی واپسی ہوئی ہے۔

یاد رہے کہ اسلام آباد یونائیٹڈ کی ٹیم اب تک ٹورنامنٹ میں 7 میں سے 5 میچز جیت چکی ہے۔

کوئٹہ گلیڈی ایٹرز سے قبل کھیلے گئے میچ میں اسلام آباد یونائیٹڈ نے اعظم خان اور فہیم اشرف کی ذمہ دارانہ بیٹنگ کی بدولت کراچی کنگز کو شکست سے دوچار کیا تھا۔