چیف جسٹس نے ہمارا مؤقف سنا لیکن کوئی جواب نہیں دیا، بیرسٹر علی ظفر

پاکستان تحریک انصاف کے سینیئر رہنما بیرسٹر علی ظفر نے بتایا ہے کہ چیف جسٹس پاکستان یحییٰ آفریدی نے ملاقات میں ہمارا مؤقف سنا لیکن کوئی جواب نہیں دیا۔

جمعہ کو اپوزیشن رہنماؤں کی چیف جسٹس پاکستان یحییٰ آفریدی سے ملاقات ہوئی جس میں پی ٹی آئی رہنماؤں نے پابند سلاسل پارٹی سربراہ عمران خان سے ملاقات نہ ہونے کا شکوہ کیا۔

سپریم کورٹ نے چیف جسٹس پاکستان سے پاکستان تحریک انصاف کے رہنماؤں کی ملاقات کا اعلامیہ بھی جاری کیا جس میں کہا گیا کہ ملاقات میں عمر ایوب، شبلی فراز، بیرسٹر گوہر علی خان، بیرسٹر علی ظفر، بیرسٹر سلمان اکرم راجہ، لطیف کھوسہ،ڈاکٹر بابر اعوان نے شرکت کی۔

رجسٹرار محمد سلیم خان اورسیکرٹری قانون و انصاف کمیشن تنزیلہ صباحت نے چیف جسٹس کی معاونت کی۔

پی ٹی آئی وفد کی چیف جسٹس پاکستان سے ملاقات دو گھنٹے تک جاری رہی۔

پاکستان تحریک انصاف کے سینیئر رہنما سینیٹر علی ظفر نے ایک نیوز پروگرام میں گفتگو کرتے ہوئے بتایا کہ چیف جسٹس پاکستان نے ہمارا مؤقف سنا لیکن کوئی جواب نہیں دیا، انہوں نے ملاقات کے آغاز پر ہی کہہ دیا تھا کہ اس ملاقات کا ایجنڈا عدالتی اصلاحات ہیں۔

بیرسٹر علی ظفر نے بتایا کہ چیف جسٹس نے کہہ دیا تھا کہ ہم جو کچھ بھی کہیں گے، وہ ہمیں روکیں گے نہیں، لیکن اس کا جواب نہیں دیں گے۔

اس کے علاوہ  تحریک انصاف کے چیئرمین بیرسٹر گوہر کا کہنا ہے کہ انہوں نے ملاقات میں چیف جسٹس کو 26 نومبر کے بارے میں بتایا، اس پر انہوں نے جوڈیشل کمیشن سمیت قانونی تجاویز مانگی ہیں ۔

بیرسٹر گوہر نے کہا کہ چیف جسٹس نے باور کرایا ہے کہ وہ ایسے اقدامات کریں گے جن سے ان مسائل کا حل نکل سکے۔

سلمان اکرم راجا نے کہا کہ انہوں نے ملاقات میں چیف جسٹس کو بتایا کہ آپ کی عدالت کے حکم کو کوئی حکم ہی نہیں سمجھتا ، عدالت دیکھے کہیں نظامِ عدل کو آلۂ کار تو نہیں بنایا جارہا، ملک میں انسانی حقوق عملاً ختم ہوچکے ہیں۔