نظام شمسی کے 6 سیارے ایک قطار میں آنےکیلئے تیار

سیاروں کو دیکھنے کے شوقین افراد  کیلئے ایک نایاب اور منفرد خلائی نظارہ منتظر ہے۔

نظام شمسی کے 6 سیارے ایک قطار میں آنے کےلیے تیار ہیں جس کے تحت  21 جنوری کو  آپ رات کے وقت  6 سیاروں کو آسمان پر دیکھ سکیں گے۔

21جنوری سے زہرہ، مریخ ،مشتری ، زحل ،نیپچون  اور یورینس  ایک قطار میں ہوں گے جن کا مشاہدہ رات میں  کیا جاسکے گا۔

پلینیٹری الائنمنٹ یا پلینیٹری پریڈ کہلائے جانیوالے اس نظارے میں زہرہ، مریخ، مشتری اور زحل بغیر ٹیلی اسکوپ جب کہ نیپچون  اوریورینس کو ٹیلی اسکوپ کے ساتھ دیکھا جاسکے گا۔

ماہرین کے مطابق متعدد سیاروں کو ایک قطار میں دیکھنا ہمیشہ ایک خصوصی نظارہ ہوتا ہے اور اس سے ہمیں نظام شمسی کی خوبصورتی اور وسعت کا اندازہ ہوتا ہے۔

ماہرین کا کہنا ہے کہ ایسا مارچ 2023 میں ہوا تھا اور اس موقع پر عطارد، زہرہ، مریخ، مشتری اور یورینس کو دیکھا گیا تھا۔

اس کے بعد 3 جون 2024  کو بھی عطارد، مریخ، مشتری، زحل، یورینس اور نیپچون کو ایک سیدھی لکیر میں دیکھا گیا تھا۔