پاکستان کے ساتھ پارٹنر شپ کی بڑی تاریخ ہے، اس سے تعاون جاری رکھیں گے: امریکی سفیر

اسلام آباد: امریکی سفیر ڈونلڈ بلوم نے کہا ہےکہ  ہم پاکستان کے آئی ایم ایف کے ساتھ کام کو سپورٹ کرتے ہیں اور پاکستان کے ساتھ تعاون کا سلسلہ جاری رکھیں گے۔

پاک امریکا تعلقات کے حوالے سے منعقدہ سیمینار سے خطاب میں امریکی سفیر نے کہا کہ پاکستان اور امریکا شراکت داری اور تعاون کی طویل تاریخ رکھتے ہیں، امریکا پاکستان کے ساتھ تعلقات کو اہمیت دیتا ہے، امریکا سمجھتا ہے کہ پاکستان میں بہت استعدادکار موجود ہے جب کہ پاکستان کے پاس متحرک نوجوان آبادی ہے۔

ڈونلڈ بلوم نے کہا کہ پاکستان کے ساتھ تعاون کا سلسلہ جاری رکھیں گے، امریکا اور پاکستان کے درمیاں پارٹنرشپ کی بڑی تاریخ ہے، دہشتگردی کے خلاف جنگ میں پاکستان کی قربانیوں کی قدرکرتے ہیں، گزشتہ سال دونوں ممالک کےدرمیان تجارت 9 ارب ڈالر سے تجاوز کرگئی، امریکا کے نجی شعبے پاکستان کے پوٹینشل کےمعترف ہیں۔

امریکی سفیر کا کہنا تھا کہ ہم پاکستان کے آئی ایم ایف کے ساتھ کام کو سپورٹ کرتے ہیں، ہم منگلا ڈیم کو نئے ٹربائنزکےساتھ اپ گریڈ کر رہے ہیں، ہم 250 ملین ڈالر کی سرمایہ کاری صاف پانی کی فراہمی میں کر رہے ہیں جب کہ 85 ملین ڈالر میل نیوٹریشن کے خاتمے پر سرمایہ کاری کررہے ہیں۔

ڈونلڈ بلوم نے مزید کہا کہ شعبہ تعلیم اور اکیڈمک پروگرام میں 20 ملین ڈالر کی سرمایہ کاری کررہے ہیں، ہم گندھارا تہذیب کے تحفظ کو بھی سپورٹ کررہے ہیں جب کہ امریکا ایک بلین ڈالر صوبوں کو جسٹس اینڈ سکیورٹی پروگرام میں فراہم کررہا ہے، ہم پاکستان میں ہیلتھ کیئر سسٹم میں سرمایہ کاری کررہے اور  مستقبل میں بھی سرمایہ کاری کریں گے۔

امریکی سفیر کا کہنا تھا کہ پاکستان اور امریکا مشترکہ طور پر افغان مہاجرین اور  پناہ کی تلاش میں لوگوں کوسپورٹ کررہے ہیں، خیال کیا جاتا ہےکہ پاک امریکا تعلقات کا محور سکیورٹی مسائل ہیں مگر ایسا ہرگز نہیں،گزشتہ کئی سالوں میں امریکا نے  پاکستان کو قدرتی آفات اور معاشی طورپرسپورٹ کیا۔